02.06.26
Азербайжан Борбор Азия өлкөлөрү жана Түркия менен биргеликте жаңы эл аралык энергетикалык коридорлорду өнүктүрүү боюнча иштерди активдүү жүргүзүүдө. Бул долбоорлор аймактын энергетикалык коопсуздугун чыңдоого жана электр энергиясын экспорттоонун жаңы багыттарын түзүүгө багытталган.
Бул тууралуу Азербайжандын энергетика министринин орун басары Орхан Зейналов Бакуда өткөн 31-Эл аралык энергетикалык форумда билдирди. Анын айтымында, дүйнөлүк энергетика тармагындагы негизги тенденциялардын бири электрлештирүү процесси. Кайра жаралуучу энергия булактары, жаратылыш газы жана гидроэнергетика менен айкалышкан мындай ыкма энергетикалык коопсуздукту камсыздоодо маанилүү роль ойнойт. Орхан Зейналов Кара деңиз аркылуу өтүүчү «жашыл» энергетикалык коридордун техникалык-экономикалык негиздемеси ушул жылдын күз айларына чейин даяр болорун маалымдады.
Мындан тышкары, Азербайжан менен Түркия жаңы энергетикалык интерконнекторду куруу боюнча иш алып барууда. Учурда бул маршрут аркылуу 1 ГВт электр энергиясын экспорттоо боюнча макулдашуу бар. Бирок техникалык-экономикалык негиздеме аяктагандан кийин өткөрүмдүүлүк кубаттуулугун 3 ГВтка чейин көбөйтүү мүмкүнчүлүгү каралууда.
Зейналовдун айтымында, жаңы энергетикалык байланыш Түркия менен Зангезур коридору аркылуу өтөт деп күтүлүүдө. Ал Түркиянын батыш аймактары чоң мүмкүнчүлүктөргө ээ экенин белгилеп, келечекте бул энергия своп механизмдери аркылуу Европа рынокторуна жеткирилиши мүмкүн экенин айтты.
Форумдун жүрүшүндө министрдин орун басары Өзбекстан жана Казакстан менен биргеликте ишке ашырылып жаткан «Борбор Азия – Азербайжан» энергетикалык коридору долбоору тууралуу да маалымат берди.
Анын белгилешинче, бул долбоор Борбор Азия менен Азербайжандын тарыхта биринчи жолу түз энергетикалык байланыш түзүүсүнө шарт түзөт. Ошол эле учурда негизги максат электр энергиясын экспорттоо көлөмүн көбөйтүү менен чектелбестен, альтернативдүү маршруттарды түзүү, ошондой эле энергия жеткирүү системасынын ийкемдүүлүгүн жана диверсификациясын камсыз кылуу болуп саналат.
Анын айтымында, жаңы энергетикалык коридорлор «жашыл» энергиянын экспортун кеңейтүүгө гана эмес, Азербайжандын Борбор Азия, Түштүк Кавказ жана Европа ортосундагы маанилүү энергетикалык жана транзиттик түйүн катары позициясын дагы бекемдөөгө мүмкүндүк берет.
