01.08.26
Азербайжанга таандык Каспий деңизинин акваториясындагы жалпы аянты 711,4 чарчы чакырым болгон суу тилкеси кайра жаралуучу энергия булактарынын аймагы деп жарыяланды. Тиешелүү чечимге Азербайжандын Премьер-министри Али Асадов кол койду.
Министрлер Кабинети кабыл алган чечимге ылайык, бул кадам электр энергиясын өндүрүүдө кайра жаралуучу энергия булактарынын мүмкүнчүлүктөрүн натыйжалуу пайдалануу максатында жасалды. Белгиленген деңиз аймагында, негизинен, деңиздеги (offshore) шамал электр станцияларын куруу пландалууда.
Чечимдин алкагында Азербайжандын Энергетика министрлиги Президент Ильхам Алиевдин 2023-жылдын 2-августундагы жарлыгы менен бекитилген «Кайра жаралуучу энергия булактары аймагында электр энергиясын өндүрүүчүнү тандоо эрежелерине» ылайык, аталган аймакта электр энергиясын өндүрүүчү компанияны тандоо боюнча зарыл чараларды көрөт.
Жаңы тартипке ылайык, чечим күчүнө киргенден тартып, кайра жаралуучу энергия аймагы деп жарыяланган 711,4 чарчы чакырым суу тилкесинде шамал электр станциясын куруу үчүн зарыл болгон уруксаттар Азербайжандын «Электр энергиясын өндүрүүдө кайра жаралуучу энергия булактарын пайдалануу жөнүндө» мыйзамынын 6.7-беренесинде көрсөтүлгөн мөөнөттөрдө жана Шаар куруу жана курулуш кодексине ылайык алынат.
Мындан тышкары, Азербайжандын Мамлекеттик шаар куруу жана архитектура комитети курулушка уруксат берүү же баш тартуу тууралуу чечим кабыл алынгандан кийин үч күндүн ичинде Министрлер Кабинетине маалымат берүүгө милдеттүү болот.
Чечимдин аткарылышын көзөмөлдөө милдети Азербайжан Республикасынын Министрлер Кабинетинин Аппаратынын Айыл чарба жана экология бөлүмүнө жүктөлдү.
Бул кадам Азербайжандын кайра жаралуучу энергия тармагына инвестицияларды көбөйтүү жана өзгөчө деңиздеги шамал энергетикасынын кубаттуулугун өнүктүрүү боюнча стратегиялык максаттарына жетүүдөгү маанилүү кадам катары бааланууда.
