15.12.25
Казакстан Түркмөнстан менен мамлекеттик чек арасында жайгашкан жаңыртылган “Темир-баба” автотранспорттук өткөрмө бекети, ошондой эле Өзбекстан менен чек арасындагы “Казыгурт” бекети пайдаланууга берилди. Бул тууралуу жума күнү Казакстандын Премьер-министринин басма сөз кызматы билдирди.
Өткөрмө бекеттер Казакстандын президенти Касым-Жомарт Токаевдин тапшырмасы менен ишке ашырылып жаткан чек ара инфраструктурасын модернизациялоо боюнча мамлекеттик программанын алкагында ачылды.
Өткөрмө бекеттерди модернизациялоо өткөрмө бекеттердеги жүргүнчүлөрдүн жана автоунаалардын жүрүүсүнө тоскоолдугу жок жүргүзүлдү. Жүк жана жүргүнчүлөрдүн үзгүлтүксүз каттамын камсыз кылуу максатында реконструкция мезгилинде убактылуу кыймыл схемасы киргизилип, кезектердин пайда болушуна жол берилген жок.
Заманбап технологиялык чечимдерди киргизүүнүн натыйжасында “Темир-баба” өткөрмө пунктунан чек арадан өтүү убактысы 30 мүнөткө чейин кыскарып, өткөрүү мүмкүнчүлүгү суткасына 1 миң автоунаага чейин жогорулады. Азыртадан эле жаңыртылган өткөрмө пункт аркылуу транспорт агымынын өсүшү байкалууда. Мындай кадамдар, Казакстан менен Түркмөнстандын соода-экономикалык байланыштарынын жандануусуна өбөлгө түзүүдө.
“Темир-баба” өткөрмө пунктун жаңылоо Казакстандын Кытай, Өзбекстан жана Түркмөнстан менен чек араларындагы тогуз автотранспорттук өткөрмө пунктту камтыган ири масштабдагы программанын алкагында жүргүзүлүүдө. Буга чейин “Капланбек”, “Атамекен”, “Кольжат” жана “Алакөл” өткөрмө пункттарында иштер аяктаган. Жыл аягына чейин “Тажен”, “Майкапчагай” жана “Бахты” пункттарын модернизациялоо пландалууда.
