12.02.26
Кыргызстандын Транспорт жана коммуникациялар министри Абсаттар Сыргабаев жана Өзбекстандын Транспорт министри Илхом Махкамов 11-февралда Стамбул шаарында жолугушуу өткөрүштү. Бул тууралуу министрликтин басма сөз кызматы билдирди.
Сүйлөшүүлөр Ислам кызматташтык уюмуна (ИКУ) мүчө өлкөлөрдүн транспорт ведомстволорунун жетекчилеринин экинчи жыйынынын алкагында өттү. Талкуунун негизги темасы “Кытай — Кыргызстан — Өзбекстан” темир жолун куруу долбоорун ишке ашыруу болду. Министрлер аткарылып жаткан иштердин учурдагы баскычы тууралуу маалымат алмашып, эки мамлекеттин транзиттик мүмкүнчүлүктөрүн толук пайдаланууга тоскоол болуп жаткан бөгөттөрдү жоюу зарылдыгын белгилешти.
Жолугушуунун программасына түштүк багытындагы логистика маселелери да кирди. Тараптар Кыргызстан аймагы аркылуу Пакистанга жүк ташуу шарттарын карап чыгып, өзбекстандын айдоочуларына виза берүү маселесин талкуулашты.
Сүйлөшүүнүн жыйынтыгында тараптар транспорт тармагындагы көйгөйлүү маселелерди ыкчам чечип, кызматташууну чыңдоо боюнча макулдашууга жетишти.
