14.03.26
Кыргызстандын Түркиядагы Соода өкүлү Чыңгыз Эсенгул уулу Мерсин соода-өнөр жай палатасынын жетекчилиги жана кургак азык-түлүктөрдүн ири экспорттоочулары менен Кыргызстандагы буурчакты жеткирүүнү кеңейтүү максатында бир катар сүйлөшүүлөрдү өткөрдү. Бул тууралуу Кыргызстандын Экономика министрлигинин басма сөз кызматы билдирди.
Жолугушуулардын жүрүшүндө, тараптар өндүрүүчүлөр менен импорттоочулардын ортосунда түз байланыш түзүүнүн механизмдерин талкуулашты. Мындай иш чаралар продукциянын баасына ортомчулардын таасирин азайтууга жана жеткирилген чийки заттын сапатын жакшыраак көзөмөлдөөгө мүмкүнчүлүк берет.
Иш сапардын алкагында, экспорттолуп жаткан товарлардын сапаттык көрсөткүчтөрүнө, атап айтканда буурчактын көлөмүнө жана дүйнөлүк стандарттарга шайкештигине өзгөчө көңүл бурулду. Түрк тарап сатып алуулар көлөмү дүйнөлүк баалардын динамикасына жана сапат көрсөткүчтөрүнүн туруктуулугуна түздөн-түз көз каранды экенин белгиледи. Уруктук фондду системалуу жакшыртуу үчүн кыргызстандык аграрчыларга Түркиянын Уруктук өндүрүүчүлөр союзу менен кызматташтыкты жолго коюу сунушталды. Бул ата мекендик буурчактын эл аралык рыноктогу атаандаштыкка жөндөмдүүлүгүн жогорулатууга жардам берет.
Иш сапардын жүрүшүндө Чыңгыз Эсенгул уулу “Saysan Dış Ticaret Ltd. Şti.”, “Dervişoğlu Bakliyat A.Ş.” жана “Tat Bakliyat Sanayi ve Ticaret A.Ş.” компанияларынын өндүрүштүк кубаттуулуктары менен таанышып чыкты. Аталган ишканалардын жетекчилиги менен Кыргызстандын кайра иштетүү тармагына Түркиянын инвестицияларын тартуу маселелери талкууланып, өндүрүштүк потенциалды жогорулатуу жолдору каралды. Инвестициялык кызматташтык техникалык базаны модернизациялоо жана продукцияны Түркиянын талаптарына ылайык экспортко даярдоо маселелери талкууланды.
Жетишилген макулдашууларды иш жүзүндө ишке ашыруу үчүн адистештирилген “B2B” форматында жолугушууларын уюштуруу сунушталды. Мындай формат кыргызстандык айыл чарба өндүрүүчүлөрүнө өз мүмкүнчүлүктөрүн Мерсиндеги ири сатып алуучуларга түздөн-түз тааныштырууга шарт түзөт.
