08.04.26
Баку шаарында өткөн ТҮРКПАнын Экономикалык кызматташтык боюнча комиссиясынын 13-жыйынында биргелешкен ишканалар тууралуу модель мыйзам долбоору жактырылды. Бул тууралуу Кыргыз Республикасынын Жогорку Кеңешинин басма сөз кызматы маалымдады.
Маалыматка ылайык, документ уюмдун алдыдагы пленардык жыйынына сунушталат. Жыйынга Азербайжандын Милли Меджлисинде Кыргызстандын атынан депутат Бекмурза Эргешов катышты. Ал өз сөзүндө Кыргызстан үчүн айыл чарбасын өнүктүрүү жана соода-экономикалык байланыштарды кеңейтүү артыкчылыктуу багыт экенин белгиледи.
Ошондой эле депутат өлкөлөр ортосундагы экономикалык кызматташууну чыңдоого багытталган биргелешкен инвестициялык долбоорлорду ишке ашыруу боюнча бир катар сунуштарын айтты. Жыйындын катышуучулары заманбап чакырыктарга биргелешип жооп кайтаруу жолдорун жана түрк мамлекеттеринин ортосундагы интеграцияны тереңдетүү механизмдерин талкуулашты.
Бекмурза Эргешовдун айтымында, кабыл алынган чечимдер экономикалык кызматташууну жаңы сапаттык деңгээлге чыгарууга өбөлгө түзөт. Ал эми сунушталган документ мамлекеттер аралык биргелешкен ишканаларды түзүү жана алардын ишмердүүлүгүн жөнгө салуу үчүн укуктук негизди камсыздайт.
