06.05.26
Президент Садыр Жапаров 6-майда Баткен облусуна болгон иш сапарынын алкагында Кыргызстан, Тажикстан жана Өзбекстандын чек аралары кесилишкен жерде куруу пландалып жаткан “Достук” эл аралык соода-экономикалык паркынын концепциясы менен таанышты. Бул тууралуу мамлекет башчысынын басма сөз кызматы билдирди.
Белгиленгендей, долбоор 2025-жылы Достук стеласын орнотуу менен башталган аймактык кызматташтыкты чыңдоо демилгесинин уландысы болот.
Мамлекет башчысына жалпы аянты 100 гектарды түзгөн комплекстин башкы планы сунушталды. Документке ылайык, чек ара аймагында административдик, өндүрүштүк, логистикалык жана коммерциялык зоналар үчүн атайын аянттар бөлүнөт. Долбоордо ошондой эле Улуу Жибек жолунун мурасын даңазалаган эл аралык көргөзмөлөрдү жана этнофестивалдарды өткөрүүгө арналган туристтик инфраструктура каралган. Мындай объектилерди өнүктүрүү чет элдик инвестицияларды тартууга жана аймактагы соода-логистикалык байланыштарды кеңейтүүгө багытталган.
Бийлик өкүлдөрү “Достук” паркынын ишке кириши 5 миңден ашуун жумуш ордун түзүп, чек ара соодасынын көлөмүн көбөйтөт деп күтүшүүдө. Мамлекет башчысы үч өлкөнүн туруктуулугун жана гүлдөп-өнүгүшүн камсыз кылууда биргелешкен экономикалык демилгелердин маанисин баса белгиледи.
Садыр Жапаров белгилегендей, тараптардын өз ара колдоосу менен бул долбоор бизнес үчүн гана аянтча болбостон, Борбор Азия элдеринин ишениминин жана биримдигинин символуна айланат. Ири масштабдагы планды ишке ашыруу Кыргызстан, Тажикстан жана Өзбекстандын тиешелүү мекемелеринин тыгыз кызматташуусун талап кылат.
