12.09.24
Ысык-Көл районунун Көк-Мойнок айылында Кыргызстандагы алгачкы шамал электр станциясынын курулушунун башталышы катары капсула салуу аземи болуп өттү.
Долбоорду Россиянын “Росатом кайра жаралуучу жашыл энергия” компаниясы ишке ашырат. Кыргызстандын Энергетика министри Таалайбек Ибраевдин айтымында, долбоор 120 миллион долларга бааланган.
Маалым болгондой, бул аймакта шамалды өлчөө иштери 2024-жылдын март айында башталган. Жабдуулардын биринчи жеткирилиши 2025-жылдын биринчи кварталында күтүлүүдө. Долбоор боюнча 2026-жылы объектти толук пайдаланууга берүү пландалууда.
Келечектеги шамал электр станциясынын аянты 200 гектарга жетет. Өндүрүлгөн кубаттуулук 100 МВт болмокчу. Жылына 280 ГВт энергия өндүрүлөт.
Маалым болгондой, объект пайдаланууга берилгенден кийин долбоордун алкагында курулган жолдорду жергиликтүү тургундар пайдалана алышат. Мындан тышкары шамал станциясынын аймагын дыйканчылык жана мал чарбачылыгы үчүн пайдаланууга болот.
