17.12.24
Кыргызстандын президенти Садыр Жапаров Өзбекстандын жаңы элчиси Саидикрам Ниязходжаевден ишеним грамоталарын кабыл алуу аземинде, эки тараптуу кызматташуунун артыкчылыктуу багыттарын белгиледи. Жолугушуу 17-декабрда Бишкекте болуп өттү. Бул тууралуу, Кыргызстандын президентинин басма сөз кызматы билдирди.
Тараптар соода-экономикалык мамилелердеги оң динамиканы, анын ичинде өз ара соода көлөмүнүн өсүшүн жана товарлардын түрлөрүнүн кеңейгенин белгилешти.
Маанилүү кадам катары, Садыр Жапаровдун июль айындагы Өзбекстанга жасаган мамлекеттик сапары учурунда кабыл алынган чечимге ылайык, Жогорку Мамлекеттер аралык кеңешти түзүү пландалууда.
Элчи Ниязходжаев бул сапар эки тараптуу мамилелерди өнүктүрүүгө чоң түрткү бергенин белгилеп, товар жүгүртүүнү 2 миллиард долларга чейин көбөйтүү боюнча амбициялуу максатты белгиледи жана энергетика, транспорт, туризм тармактарында биргелешкен долбоорлорду ишке ашырууга активдүү аракеттенүүгө даяр экендигин билдирди.
