28.04.25
Кыргызстандын өкмөт башчысынын орун басары Бакыт Торобаев Астанага жасаган иш сапарында, Казакстандын премьер-министринин орун басары Серик Жумангарынов менен жолугушту. Бул тууралуу Кыргызстандын Айыл чарба министрлигинин басма сөз кызматы билдирди.
Жолугушууда эки өлкөнүн ортосундагы кызматташтык маселелери талкууланды. Тараптар Кыргызстандын айыл чарба продукциясын Казакстанга экспорттоо үчүн “жашыл коридор” түзүү боюнча макулдашышты. Мындан тышкары, мунай жеткирүү жана миграциялык эрежелерди жеңилдетүү боюнча биргелешип иштөө боюнча да келишимге келишти.
“Жашыл коридор” долбоорун ишке ашыруу үчүн Кыргыз “Агрохолдинг” компаниясы жана Казакстандын соода комитети жана “Казтрейд” компаниясы биргелешип айыл чарба продукцияларынын тизмесин жана көлөмүн аныктоо боюнча иш алып барышат.
Ошондой эле тараптар, Казакстандын магистралдык темир жолдорунун кызматтарынын тарифтерине социалдык маанилүү товарларды экспорттоо жана транзит жасоо учурунда мүмкүн болгон жеңилдиктерди талкуулашты.
Бакыт Торобаев жана Серик Жумангарынов мурунку жетишилген макулдашууларды жана эки өлкөнүн ортосундагы кызматташтыкты чыңдоого багытталган стратегиялык демилгелерди ишке ашыруу үчүн иштешүүгө даяр экендиктерин билдиришти.
