21.07.25
Кыргызстандын Экономика министринин орун басары Султан Ахматов Кыргызстан менен Өзбекстандын ортосундагы 2024–2030-жылдарга карата өз ара сооданын көлөмүн жогорулатуу боюнча иш-чаралар планын ишке ашыруу маселелерин талкуулаган жыйын өткөрдү. Жыйынга мамлекеттик органдардын өкүлдөрү катышты.
Бул документ соода-экономикалык байланыштарды системдүү түрдө кеңейтүүгө, тоскоолдуктарды жоюуга жана өнөр жай кооперациясын өнүктүрүүгө багытталган. Жолугушууда өзгөчө көңүл айыл чарба продукциясы, текстиль, курулуш материалдары жана электр жабдыктары менен сооданы өнүктүрүүгө бурулду.
Катышуучулар пландын учурдагы аткарылышын карап чыгып, мындан аркы кызматташууну активдештирүү боюнча кадамдарды белгилешти.
Жыйындын жыйынтыгында мамлекеттик органдарга пландалган тапшырмаларды ыкчам аткаруу, маалымат алмашууну күчөтүү, биргелешкен бизнес-долбоорлорду тез-тез көтөрүп чыгуу жана соода процессинде жаралган маселелерге ыкчам жооп кайтаруу тапшырмасы берилди.
