08.09.25
2025-жылдын 7-сентябрда Кыргызстандын Чолпон-Ата шаарында, регионалдык энергетикалык кызматташуу маселелери боюнча жыйын болуп өттү. Бул көрүшмөдө Кыргызстан, Казакстан жана Өзбекстан 2025–2026-жылдардын күз-кыш мезгилинде электр энергиясын жеткирүү тууралуу протоколго кол коюшту.
Документке ылайык, тараптар Кыргызстандын Токтогул суу сактагычындагы суу ресурстарын сактоо жана Кыргызстандагы электр энергиясынын тартыштыгын Казакстан менен Өзбекстандан алуу аркылуу компенсациялоо милдеттемесин алышты.
Ошол эле учурда, Россиядан Кыргызстанга электр энергиясын Казакстандын энергосистемасы аркылуу, ал эми Түркмөнстандан Өзбекстан аркылуу транзит кылуу шарттары макулдашылды.
Кыргызстандын Энергетика министри Таалайбек Ибраев белгилегендей, коңшу мамлекеттер менен тыгыз кызматташтык региондогу энергетикалык туруктуулук менен түздөн-түз байланышкан.
Кыргызстандын Энергетика министри Таалайбек Ибраев: “Биргелешкен аракеттерибиз менен элибизди тынымсыз электр энергиясы менен камсыздап, энергетикалык коопсуздукту жана туруктуулукту бекемдейбиз”, — деп белгилеп өттү.
