23.02.25
Венгриянын “WizzAir” авиакомпаниясы Өзбекстанда биргелешкен ишкана түзүү мүмкүнчүлүгүн карап жатат. Бул тууралуу “Spot” басылмасы жазды.
Маалыматка ылайык, Өзбекстандын Транспорт министри Илхом Махкамов “WizzAir” компаниясынын башкы директору Йожеф Варади жана Венгриянын элчиси Йожеф Рожа менен жолугушкан. Жолугушууда Өзбекстандан Европага авиакаттамдардын географиясын кеңейтүү жана транзиттик аба каттамдарын өнүктүрүү маселелери талкууланды.
Варади “WizzAir Abu Dhabi” компаниясынын Ташкент – Абу-Даби багыты боюнча каттамдардын санын көбөйтүүгө кызыкдар экенин белгиледи. Ошондой эле Наманган жана Ургенч шаарларына жаңы каттамдарды ачуу мүмкүнчүлүгү каралууда.
Мындан тышкары, тараптар Өзбекстан аймагында биргелешкен авиакомпания түзүү перспективаларын талкуулашты. Негизги долбоорлордун бири катары Ташкент – Будапешт түз каттамын ачуу пландалууда, ал 2025-жылдын аягына чейин ишке кириши мүмкүн.
