19.02.2026
Өзбекстан Евразия аймагында Түркиядан келген түз чет өлкөлүк инвестициялардын эң ылдам өсүшү байкалган өлкө болуп калды. 2025-жылдын биринчи жарым жылдыгына карата Түркиянын Өзбекстандагы топтолгон инвестициянын көлөмү 3,1 млрд долларга жетти. 2023-жылдан бери инвестициялар 1,2 млрд долларга көбөйсө, 2016-жылдан бери өсүш 3 млрд долларды түздү. Ал эми 2016-жылдын башында түрк инвестицияларынын көлөмү эң төмөн деңгээлде болгон.
Инвестициялардын тездик менен өсүшү 2017-жылдан тартып, Өзбекстанда жүргүзүлгөн, өлкөнүн инвестициялык жагымдуулугун жогорулатууга багытталган масштабдуу экономикалык реформалардын натыйжасында мүмкүн болду. 2019-жылдан тартып Түркиядан келген капиталдын агымы туруктуу көбөйүп, Өзбекстан түрк компаниялары үчүн Евразиядагы негизги инвестициялык багыттардын арасында Азербайжанды артта калтырды.
Түркиянын Өзбекстандагы эң ири долбоору, Жизак облусунда курулуп жаткан буу-газ электр станциясы. Долбоор боюнча жалпы инвестиция көлөмү болжол менен 500 млн долларга жетиши мүмкүн.
Азербайжан да Түркиядан инвестиция тарткан негизги өнөктөштөрдүн бири бойдон калууда. Түркиянын бул өлкөдөгү жана жалпы Евразия аймагындагы эң ири инвестициялык долбоору Каспий деңизинин түштүк бөлүгүндөгү “Шах-Дениз” газ кенин иштетүү. Түркиянын мамлекеттик TPAO (Türkiye Petrolleri Anonim Ortaklığı) компаниясы бул кенди өздөштүрүү жана газ өндүрүү боюнча эл аралык консорциумдун катышуучуларынын бири болуп саналат.
Түркиянын инвестицияларынын олуттуу бөлүгү Түркмөнстан жана Кыргызстанда да топтолгон. Түркмөнстанда эки ири долбоорго жалпысынан 1,1 млрд доллар инвестиция салынган. Анын 1 млрд доллардан ашыгы “Түркмөнстан — Афганистан — Пакистан” электр берүү линиясын курууга багытталган. Бул долбоордун Түркмөнстан аймагындагы жалпы наркы 1,7 млрд долларга бааланат.
Кыргызстанда Түркия капиталынын катышуусу менен жалпы суммасы болжол менен 1 млрд долларды түзгөн сегиз инвестициялык долбоор ишке ашырылууда. Алардын эң ирилери, Түркия өкмөтү болжол менен 398 млн доллар инвестиция салган Кыргыз-Түрк “Манас” университетинин курулушу жана наркы 350 млн доллар болгон “Эти Бакыр Терексай” алтын өндүрүү фабрикасы. Жалпысынан Түркиянын Борбор Азия өлкөлөрүндөгү инвестициялык активдүүлүгүнүн өсүшү Евразия мейкиндигинде стратегиялык өнөктөштүктүн тереңдеп, экономикалык кызматташуунун кеңейип жатканын көрсөтөт.
