11.09.26
Азербайжан менен Түркия энергетика тармагындагы кызматташтыгын мунай жана жаратылыш газы менен гана чектебестен, эки өлкөнүн электр энергетика тутумдарын тыгыз интеграциялоо багытында иштерди кеңейтүүдө. Бул тууралуу, Түркиянын Энергетика жана жаратылыш ресурстары министри Алпарслан Байрактар Азербайжан-Түркия V энергетикалык форумунда билдирди.
Анын айтымында, Түркия менен Азербайжандын мамилелери коңшулук жана коммерциялык өнөктөштүк менен гана чектелбейт. Алпарслан Байрактар: “Биздин байланыштарыбыз тарыхтын терең тамырларынан башталган бекем бир туугандыкка, өз ара ишенимге жана биргелешкен ийгиликтерге негизделген. Биз бул форумду эки өлкөнүн энергетика тармактарын бириктирген аянтча катары гана эмес, “бир улут — эки мамлекет” принцибинин негизинде жалпы келечегибизди калыптандыруучу стратегиялык платформа катары карайбыз”, — деп белгилеп өттү.
Байрактар эки өлкөнүн энергетика жаатындагы кызматташтыгы мунай жана жаратылыш газынан тышкары тоо-кен өнөр жайын, кайра жаралуучу энергия булактарын, энергиянын натыйжалуулугун, электр энергиясынын рынокторун, ошондой эле электр энергиясын берүү жана бөлүштүрүү системаларын камтый турганын белгиледи.
Министрдин маалыматына караганда, дүйнөлүк энергетика тармагы масштабдуу өзгөрүүлөрдү баштан кечирип, энергетикалык система барган сайын электр энергиясына багыт алууда. «Сөз энергия өндүрүү жөнүндө гана болуп жаткан жок. Эң негизгиси — өндүрүлгөн энергияны керектөөчүлөргө коопсуз, туруктуу, тез жана натыйжалуу жеткирүү», — деп белгиледи ал.
Анын айтымында, кубаттуу жана өз ара байланышкан электр энергетика системалары энергия менен камсыздоонун коопсуздугун бекемдеп, кайра жаралуучу жашыл энергия булактарын интеграциялоону жеңилдетет жана өлкөлөр ортосунда электр энергиясын соодалоо үчүн жаңы мүмкүнчүлүктөрдү түзөт.
Байрактар Түркия интерконнекторлорду эки энергетикалык системаны бириктирген техникалык линия катары гана эмес, өлкөлөрдүн энергетикалык системаларын мындан ары да тыгыз интеграциялоого өбөлгө түзгөн стратегиялык инструмент катары карай турганын кошумчалады.
