12.09.2026
Министр Байрактар Түркия менен Азербайжандын энергетика тармагындагы кызматташтыгын баалады. Дүйнө кризистер дүйнөсүнө айланганын жана кризистер эми «жаңы нормалдуу көрүнүшкө» айланганын белгилеген Байрактар мындай шартта Түркия менен Азербайжан энергетика тармагында алдын ала божомолдоого боло турган, диверсификацияланган жана кыйла тыгыз кызматташтыкты өнүктүрүп жатканын айтты.
Байрактар “Баку–Тбилиси–Эрзурум” жаратылыш газ кууру, TANAP жана TAP сыяктуу долбоорлорду эске салып: «Быйылкы жылга карата TANAP аркылуу 100 миллиард куб метр жаратылыш газынын агымы ишке ашты. Бул газ кууру Европанын энергетикалык камсыздоо коопсуздугуна абдан чоң салым кошууда”, — деп билдирди.
Түркия менен Азербайжандын бири-бирин толуктаган өзгөчөлүктөргө ээ экенин белгилеген Байрактар, Азербайжан маанилүү мунай жана жаратылыш газ өндүрүүчү өлкө экенин, эми электр энергиясын өндүрүүчү өлкөгө айлануу багытында өнүгүп жатканын билдирди.
Байрактар Түркия болсо экономикасы өсүп, энергетикага болгон муктаждыгы артып жаткан рынок экенин белгилеп, «Түркия ошол эле учурда маанилүү керектөөчү болгон Европа менен көптөгөн байланыштары бар. Демек, бул жердеги энергияны Европага экспорттоо мүмкүнчүлүгүнө жана жөндөмүнө ээ өлкө», — деп белгилеп өттү.
Бул өзгөчөлүктөр Түркия менен Азербайжанды бири-бирин толуктаган эки өлкөгө айлантып жатканын айткан Байрактар, эки өлкөнүн президенттери белгилеген биргелешкен көз караш да ушуга ылайык долбоорлорду иштеп чыгууга өбөлгө түзүп жатканын билдирди.
Учурдагы энергетикалык долбоорлордун кубаттуулугун толук пайдалануу максатталууда
Байрактар биринчи кезекте “Баку–Тбилиси–Эрзурум”, “Баку–Тбилиси–Жейхан” жана TANAP сыяктуу учурдагы долбоорлордун кубаттуулугун толук пайдалануу зарылдыгын белгиледи. Анын айтымында, учурда “Баку–Тбилиси–Жейхан” кууру аркылуу күнүнө 600 миң баррель мунай ташылууда, ал эми куурдун өткөрүү жөндөмдүүлүгү 1 миллион баррелди түзөт.
Бул куур аркылуу, Борбор Азиядагы жана түрк дүйнөсүндөгү башка булактардан алынган чийки мунайды да ташуу зарылдыгын белгилеген, Байрактар жаратылыш газы боюнча да ушундай иштер жүргүзүлүшү мүмкүн экенин айтты.
Байрактар электр энергиясы тармагында алдыда абдан ири долбоорлор турганын белгилеп: «Биз үч негизги долбоорду талкуулап жатабыз. Алар Нахчыван аркылуу Түркияга электр энергиясын берүүчү электр өткөрүү линиясынын келиши, “Түркия–Грузия–Азербайжан–Болгариянын” төрт тараптуу жашыл энергетика коридору жана Кара деңиздин түбү аркылуу Европага өтө турган электр өткөрүү линиясы”, — деп билдирди.
Түрк мамлекеттери менен энергетика жана кен тармагында биргелешкен долбоорлор
Түркия менен Азербайжандын мисалындагыдай эле башка түрк мамлекеттери да бири-бирин толуктаган бир бүтүндүктү түзөрүн белгилеген Байрактар Түркмөнстан маанилүү жаратылыш газ ресурстарына, ал эми Казакстан олуттуу мунай өндүрүү потенциалына ээ экенин айтты.
Бул өлкөлөр ошондой эле маанилүү кен байлыктарына жана кен өндүрүшүнө ээ экенин белгилеген Байрактар Казакстан дүйнөдөгү урандын маанилүү жеткирүүчүлөрүнүн бири экенин билдирди.
Байрактар: “Демек, биз энергетикада да, кен байлыктарында да ири өндүрүүчү өлкөлөр, ошондой эле Түркия сыяктуу өнөр жайы күчтүү, кен чийки заттарына муктаж, электр энергиясына жана энергетикага болгон суроо-талабы өсүп жаткан өлкө жана Түркия аркылуу ар түрдүү рынокторго чыгуу мүмкүнчүлүгү бар түзүмдө турабыз. Мындай биргелешкен иштер аркылуу дагы ири долбоорлорду чогуу жүзөгө ашырабыз», — деп белгилеп өттү.
