20.03.2025
Түркмөнстан жана Түркия энергетика секторундагы кызматташуусун активдүү улантып, 2025-жылдын аягына чейин газ жеткирүүнү 1,3 миллиард куб метрге чейин көбөйтүүнү пландап жатышат. Бул тууралуу Түркиянын Энергетика жана жаратылыш ресурстары министри Алпарслан Байрактар, Түркмөнстандын расмий маалымат каражаттарына берген маегинде билдирди.
Министр учурда иштеп жаткан келишимдерди узартуу жана жаңы энергетикалык долбоорлорду ишке ашыруу боюнча сүйлөшүүлөр жүрүп жатканын белгиледи. Мындан тышкары, ал 2025-жылдын 1-мартынан тартып түркмөн жаратылыш газы, Түркияга жеткирилип баштагандан бери 1,5 миллион үй-бүлөнүн газга болгон муктаждыгы камсыздалганын билдирди.
Алпарслан Байрактар газ жеткирүүлөр Каспий деңизи аркылуу ишке ашып жатканын белгилеп, бул маршрут мындан ары да өнүктүрүлө турганын билдирди. Ошондой эле, жаңы энергетикалык түйүндөрдү жана өткөрүү линияларын куруу маселелери каралып жатканын кошумчалады. 2025-жылдын аягына чейин, Түркмөнстан менен Түркиянын лидерлеринин жыйынтыктоочу жолугушуусу өтүп, анын алкагында жаңы энергетикалык келишимдерге кол коюлушу күтүлүүдө.
Байрактар Түркия түркмөн газынын транзити менен гана чектелбестен, мунай жана газ өндүрүү тармагында да кызматташууга кызыкдар экенин баса белгиледи. Айрыкча, “Turkish Petroleum” компаниясы Түркмөнстанга таандык “Галкыныш” кенин өздөштүрүү боюнча иштерди жүргүзүп жатат.
Сүйлөшүүлөр Бириккен улуттар уюмунун (БУУ) демилгеси менен уюштурулган “Эл аралык тынчтык жана ишеним жылы” аттуу эл аралык конференциянын алкагында өтүүдө. Бул иш-чара, Түркмөнстандын бейтараптуулугунун 30 жылдыгына арналган жана анда саясат, экономика жана аймактык кызматташтык боюнча маанилүү жолугушуулар белгиленген.
