15.12.25
Учурда Түркмөнстанда Түркиянын компанияларынын катышуусу менен жалпы суммасы болжол менен 10 миллиард долларын түзгөн 19 долбоор ишке ашырылууда. Бул тууралуу Түркиянын президенти Режеп Тайип Эрдоган Ашхабадга болгон сапарынын жыйынтыгын чыгарып жатып, Түркмөнстандын туруктуу бейтараптуулугунун 30 жылдыгына арналган Эл аралык тынчтык жана ишеним форумуна катышкандан кийин билдирди.
Түркиянын лидери белгилегендей, Түркмөнстан эгемендүүлүккө ээ болгон учурдан бери түрк бизнеси тарабынан ишке ашырылган долбоорлордун жалпы көлөмү болжол менен 55 миллиард долларга жетти. Бул тууралуу ишемби күнү “Анадолу” агенттиги кабарлады. Түркиянын президенти Түркмөнстан түрк компаниялары ири инфраструктуралык жана инвестициялык долбоорлорду ишке ашырып жаткан өлкөлөрдүн арасында маанилүү орунду ээлерин белгиледи.
Ошондой эле Режеп Тайип Эрдоган эки тараптуу товар жүгүртүүнүн көлөмүн 5 миллиард долларына чейин көбөйтүү ниети бар экенин айтып, соода-экономикалык кызматташууну мындан ары кеңейтүү үчүн чоң потенциал бар экенин белгилеп өттү. 2024-жылы Түркмөнстан менен Түркиянын ортосундагы товар жүгүртүүнүн көлөмү 2,17 миллиард долларын түзгөн.
