05.03.26
Түркмөнстандын Лебап облусунун акими Дурды Генжиев Өзбекстандын элчиси Равшанбек Алимов менен жолугуп, Өзбекстандын Бухара облусу менен Түркмөнстандын Лебап облусунун ортосунда “Алат–Фараб” чек ара соода аймагын түзүү маселесин талкуулашты.
Бул долбоор эки өлкөнүн ортосундагы товар жүгүртүүнү көбөйтүүгө, ошондой эле чек ара аймактарында экономикалык өсүштү жана калктын жашоо деңгээлин жогорулатууга өбөлгө түзөрү күтүлүүдө. Бул тууралуу “Dunyo” маалымат агенттиги дүйшөмбү күнү билдирди. Жолугушууда ошондой эле Өзбекстандын аймактары менен Түркмөнстандын Лебап облусунун ортосунда соода-экономикалык жана инвестициялык кызматташтыкты кеңейтүү маселелери каралды.
Тараптар Өзбекстандын Сурхандарья жана Кашкадарья облустарынын жана Түркмөнстандын Лебап облусунун администрациясынын ортосундагы соода-экономикалык, илимий-техникалык, маданий жана гуманитардык тармактардагы кызматташтык боюнча келишимдердин ишке ашырылышын да талкуулашты. Бул келишимдер, Түркмөнстандын президенти Сердар Бердымухамедовдун 2025-жылдын 17-ноябрында Өзбекстанга жасаган мамлекеттик сапарынын алкагында жетишилген.
Ошондой эле тараптар быйыл өтө турган Өзбекстан–Түркмөнстан аймактар аралык үчүнчү форумуна биргелешип даярдануу, ошондой эле эки өлкөнүн бизнес коомчулуктарынын катышуусу менен Бухара жана Түркмөнабат шаарларында бизнес-форумдарды өткөрүү пландарын талкуулашты.
Буга чейин Түркмөнстан менен Өзбекстан жеке секторлорунун өкүлдөрүнүн түз байланыштарын активдештирүү жана биргелешкен демилгелерди ишке ашыруу үчүн жагымдуу шарттарды түзүү маселелерин да талкуулашкан.
